Ngā Ringa Raupā
Te Miringa Sherman
Pou Whakahaere
Ngāpuhi, Te Whakatōhea, Tainui
Ko Te Miringa Sherman te Pou Whakarite o Punakura nāna tonu te whakaaro i āta waihanga mai noa i tōna ōrokohanga i tētahi pepa mahere tae rawa atu ki ngā rauemi auaha e hora nei mā te motu whānui. I te tau kua hori ko ia tonu tērā he māmā me āna tamariki tokorua, waihoki, ko te tuatoru tēnā i te kōpū tonu. Nā konā i toko ake ai te whakaaro kia whakaritea mai tētahi Papa Whakanui he mea hangaia mai i te reo Māori.
He tautōhito a Te Miringa ki ngā mahi hanga hōtaka, kiritata hoki, ka mutu i roto i ngā tau e ono kua taha kua mahi hoki a ia hei kaitohutohu pakihi ki Tāmaki Makaurau. He hinonga hou a Punakura hei whakakipakipa i te wairua otirā hei taura here hoki i te aroha o te whānau, te reo Māori, me te ao pakihi anō hoki. Mā te mahi ngātahi ki te ringa auaha o Kataraina Mahutonga kua whakapau kaha te tokorua nei ki ēnei rauemi hou hei tautoko i ngā whānau puta noa i Aotearoa.
Kataraina Mahutonga
Pou Kaiwaihanga
Ngāti Whakaue, Tūhourangi, Taranaki, Ngāti Maniapoto, Ngāti Mahuta, Ngāti Raukawa, Te Aitanga-a-Hauiti
Ko Kataraina te pou auaha o ngā mahi toi matihiko mo Punakura. Mai i tōna wā i te kura, i haututu ia ki ngā momo hangarau waihanga, ā, tae rawa mai ki ēnei rā, ko te toi matihiko tētahi o āna tino runaruna.
I riro i a ia tāna tohu kaiako mai i Te Whare Wananga o Te Kunenga ki Pūrehuroa i te tau 2017. E whakaako ana ia ki tētahi kura kaupapa Māori i Rotorua, he raukura hoki ia o taua kura. Nā te taiao o te kura te auahatanga i whakakipakipa, i poipoi hoki, heoi anō, kei roto hoki i ōna ira te puna waihangatanga.
Kere Mitai
Pou Kaiāwhina
Ngāti Pikiao, Tūhourangi-Ngāti Wāhiao, Ngai Tamahaua, Ngāti Rangitihi
He tautōhito a Kere ki ngā nama, ki te taha whakarite. E mōhio pai ana te marea ki ēnei pukenga ōnā. Kua piri mai a Kere ki te kaupapa nei hei āwhina ki te taha nama, taha whakarite, taha tuku i ngā rawa nei.
He raukura ia nō Kohanga Reo me te Kura Kaupapa Māori. Ā, i tipu tahi mai rātou ko Te Miringa, ko Kataraina hei tuakana teina ki te kura kotahi.
Kua mahi ia ki ngā wāhi maha, ki ngā tūranga maha hoki. Ko te katoa o ngā tūranga kei te taha nama o te pākihi. Ināianei, ko ia te Kaiwhakahaere Matua ki Te Ataarangi Trust.